知己知彼：錢並唔係儲番嚟

【蘋果日報】每個人身邊都或者會有一兩個非常慳家嘅朋友，幾年冇去過旅行，放假多數宅在家中，咩都黐屋企，甚至食麥記加大都要諗過度過，銀行存款數字係唯一支持佢地繼續過呢種生活嘅原動力。不過錢並唔係儲番嚟，錢係搵番嚟嘅。
後生仔識儲錢係一個好習慣，不過淨係識儲錢喺銀行某程度上係一個懶惰而膽小嘅表現。呢種人通常安於打份牛工，覺得將大部份人工儲起就夠，唔想花時間去發掘投資機會，亦唔想冒險，通常都唔會搵到大錢。而且就算你依家死慳死抵，每個月儲一萬幾千，咪又係買唔樓。係人都知有錢人最叻就係錢搵錢，後生仔想發圍或買樓，更加應該主動理財，用錢搵錢，正所謂你不理財，財不理你。
假設一個月入2萬的年輕人，同屋企人住，扣咗家用及生活必需開支，有1.2萬可以儲。當中一半即5,000蚊應該拎去做穩健、長期投資，例如月供煤氣（002）、港鐵（066）、領展（823）、滙控（005）或中資銀行股，供佢10年8年，財息兼收。另外只需要放2,000蚊入銀行應付突然開支，其餘5,000可以隨便用，玩吓去吓旅行，增值自己，又或者用嚟做高風險投資，買牛熊、窩輪、短炒股票、虛擬貨幣，乜都好，輸咗當交學費。
人唔趁後生玩吓，冒吓險，會後悔。話唔定你今日用5,000蚊買咗隻coin或token，幾年後已經有50萬。
風吹知