中環在線：楊政龍升呢　月薪22萬

【蘋果日報】英皇楊受成二公子楊政龍（Alex），一直被外界視為英皇王國接班人。跟佢傳過緋聞嘅女星多不勝數，但係喺公司差唔多十年，都未正式進入董事局。噚日英皇集團（163）出公告，終於委任佢做執行董事嘞。
公告指，Alex多年來為公司評估業務發展機遇同戰略，呢項委任將對推動公司未來發展具積極意義，並為其業務注入嶄新概念。升呢做執董後，佢年薪240萬、袍金25萬，即係月薪22萬，仲有花紅分。
32歲嘅Alex，畢業於美國波士頓沙福克大學，主修科學，畢業後就加入英皇地產部，負責樓盤項目，被譽為城中超級筍盤。
大眾聽得最多就係佢同賭王千金超蓮傳緋聞，其實佢喺公事上都十分活躍，好似早前成立「英皇電競」，早排又搞食雞戰隊，舊年10月又喺中環娛樂行開集團第一家戲院；今年初做埋北京市政協，總知瓣數多多，似乎有意成為新一代地產兼娛樂大亨。
李華華
LiWaWa@AppleDaily.com