財女手筆：買唔起樓冇得留低？

【蘋果日報】樓市熾熱，踏入2018年更加越升越急，日日見到破頂新聞，樓價一個月貴100萬更加成為常態一樣。
上年話樓價貴嘅人，今年可以講已經絕望。二手市場缺盤，業主唔憂賣，破頂價賣係基本；一手市場做獨市生意，唔理地理位置，一律賣高價，可怕嘅係，發展商一樣賣得出，二手破頂價一樣有人承接。
上屆政府樓價一升就出嚟出招，雖然最後弄巧反拙，不過都叫做做樣政府想平抑樓價，畀個希望你班市民。今屆政府，直頭無視，可能出招出無可出，不過畀市場訊息就係，政府認可樓價向上，你班人買唔起樓係你自己能力問題，同政府無關。
有呢個前設，再力推大灣區發展、高鐵通車同埋科技人才入境計劃，目的已經好明顯。潛台詞係買唔起樓嘅本土香港人係未來移往廣東省居住，騰出香港本土空間予大陸「優秀人才」。
咁嘅情況下，有能力嘅本土父母，搶樓畀自己子女作為未來留係香港生活嘅入場券，樓價係咪貴，似乎已經唔係太重要。
但願政府維持香港高樓價呢個推測並非事實，不過喺呢個時勢，買層樓揸手做保險都係可以理解。當然呢個保險係有風險，樓價將來如果大幅下挫，就要自己承擔番。
Melody
http://fb.com/whichroad