拆局：利率短期抽升言之尚早

【蘋果日報】千呼萬喚始出來的金管局7.85入市行動，昨晚終於發生，有銀行向該局敲門沽港元，終令這間「超級找換店」未致拍烏蠅，銀行結餘開始收細，雖然遲到好過無到，不過到咗又是否得咗──即總裁陳德霖一直期望利率正常化回升現象出現，還要拭目以待。
資金流入或抵銷流出
本港是資金自由進出市場，所謂食四方飯招八方風雨，資金有入亦有出，關鍵是銀行同業會否像啄木鳥般，持續頻密大量啄住7.85敲金管局大門沽港元，令結餘降至百幾廿百億元，挾高息口乃箇中玄機。
暫時睇香港已較美國，享受多了兩年低息時間（美國2015年底啟動加息）去炒資產升值，金管局歷史性啟動弱方兌換大門，短期內，套息交易令結餘收細力量，估計仍然會有，美國經濟走強或發債冚財赤，亦令資金萬劍歸宗流向美元。
不過，雷曼後全球勢力西向東移，中國主席習近平「坐大廳」，開放金融資市擴大互聯互通額度，內地獨角獸來港上市又是資金磁石，故資金流入會否抵銷流出速度，也是未知數。
雷曼後世界不再一樣，港美息差昨擘闊至1.1厘高位才引發較顯著套息效應令金管局出到手，與以往息差相距半厘到0.75厘便夠發揮威力，遊戲規則已唔同咗，當中原因包括合規監管兼「無乜肉食」，外資行已越來越少參與套戥遊戲。
金管局自2005年設立強弱雙邊兌換保證價，特別是強方7.75大閘，亦有辣有唔辣，設防洪大閘可截熱錢湧入，避免港元爆升，但明文在7.75擺陣接錢，亦令雷曼後金管局硬食流入的1,300億美元，谷大銀行結餘，套戥變慢，港息唔多升，金管局只有眼前路，沒有身後身。