木頭人跪對「門常開」

【蘋果日報】這兩天添馬公園多了3個跪在地下的木頭人，細看才發現是名為《天問》藝術作品。3個木頭人跪對「門常開」，配上不同面孔，代表3種面對權貴的態度。創作的藝術家王天仁說，作品意念跟傘運脫不了關係。
藝術家稱意念源自傘運
「抑鬱於天空的火焰下，大地靜默無說話」，達明一派《天問》的兩句歌詞寫了在木頭人身上。王天仁說這首歌聽了多年仍不過時，「好代表到香港嘅狀態，而且環境越嚟越差」。王的作品是「藝遊維港」展出的藝術品之一，收到邀請後他思考作品如何跟地方扣上關係，「咁啱個位置就係添馬公園，呢到對香港人嚟講係充滿回憶嘅地方，無論係乜政治立場，當時對傘運都會有感覺」。
3個跪在地上的木頭人分別代表不同態度，「有一個人臉係憤怒嘅表情，佢係努力想撐起身；另一個表情好傷心，代表無力嘅狀態；至於最後一個獻媚嘅表情，代表佢完全跪低晒」。每個木頭人身上都寫了不同問題，「香港嘅環境係唔鼓勵你去問問題，我就係想打開一個咁樣嘅空間」，第一天展出時有人寫下的問題令他印象深刻，「佢寫點解政總距離我哋咁近，但政府距離我哋咁遠」。
《天問》將會展出至下周一，昨亦有不少市民來觀看。30多歲的倪女士帶同兒子看完作品後不禁問政府，「香港搞咗咁多年教育改革，點解學生仲有咁多壓力？」同樣育有一子、30歲的鍾先生看完作品後亦問，「點解政府咁離地？」
■記者李雨夢