義賣盆菜籌比賽旅費老麵家X女校長　助貧苦生赴美追夢

【蘋果日報】一間是走過甲子年的老麵家，一間是曾瀕臨殺校的屋邨小學，兩者卻因非常校長洪細君成了戰友。「學生唔夠旅費出外比賽，有幾多個校長會咁肉緊？我哋義賣盆菜，都係想出少少力」，毗連沙田崇真小學的盛記，兄弟檔老闆大細B哥說。牢記全校學生名字、為鼓勵閱讀課外書，邀學生到家作客，過去一星期，洪細君又為學生旅費奔走：「去美國，成個團隊先可成行。」一個都不能少，這是奇蹟故事，也是街坊守望的溫情故事。
記者：呂麗嬋
「好多人做嘢半途而廢，你哋都要好似校長咁，堅持到最後」。洪校長帶着7個參加創意思維比賽的學生及老師到盛記，多謝好鄰居幫忙籌款。大細B哥席間對洪讚囗不絕。屋邨小學贏得港區冠軍，雖令人振奮但故事未完，「冇諗過會贏、更冇諗過有機會去美國」。讀小五、最遠只去過海南島的隊員何世龍指明白家人難負擔旅費，但心情難免如坐過山車。洪指「見到學生失望神情，好心痛」。
「將自己畀咗間學校」
創意思維世界賽分兩部份，首部份為團體話劇，第二部份屬即興題，每年有來自各地的學生隊伍，經地區選拔參賽。沙崇今年改編取西經故事，演繹「經典」這題目，表達方式創意幽默，得獎後代表香港5月到芝加哥愛荷華州立大學比賽，可惜屋邨貧苦生負擔不了每人2萬多元旅費，只能望門興嘆。
洪遂在學校專頁發起籌款，助學生籌募赴美經費。好鄰居大細B哥率先響應，細B哥張文強稱「呢幾年見證間學校嘅轉變，好感動」，又指「我哋做飲食工時出名長，校長每朝6點幾已企喺學校門口，有時夜晚11點仲見到佢，最難得係佢記得每個學生個名，勤力到我曾以為佢係保母車老闆，過嚟拉生意！」大B哥指這個非常校長在他心中「直頭係將自己畀咗間學校」。
「以前沙崇只係普通屋邨學校，學生過嚟食嘢，唔畀錢走咗去，一唔係就你推我撞，話佢就將啲辣椒油同甜醬溝埋一堆報復。自從洪校長嚟咗，啲家長嚟叩門唔收會喊，以前係派入嚟先喊，你話差幾遠？」大B哥指洪細君確創造街坊學校傳奇。
洪出任校長後即推連串改革，鼓勵學生多參加比賽，又發起閱讀計劃，邀請表現最好的同學，到她位於屯門的家作客，為學生下廚。「最遺憾係屋企最多只夠招呼20人，嗰一年讀咗104本書嘅學生都嚟唔到」。她更曾預訂雪糕車到學校門口，免費請讀書量達標的學生食雪糕。
洪形容盛記是學校最好的鄰居，「嚟做校長先認識大細B哥，知佢哋會派麵畀老人家，又會搞講座邀請學生家長去聽」，又指「學校曾經想開古箏班但冇琴，細B哥又唔知喺邊度搵到批琴借畀我哋，令我哋感激又感動」。就今次比賽，洪指大細B哥亦建議義賣盆菜籌募赴美旅費，「佢哋甚至話畀住報名費先，有信心會籌到錢，我哋梗係唔肯，但見到佢哋好上心」。都說香港再沒鄉村，但這種守望相助的街坊情，卻仍濃得化不開。