中環在線：滙豐「豪客」一姐教女人儲私己

【蘋果日報】

今日適逢國際婦女節，滙豐卓越理財環球主管邱怡靜（Bonnie）就教女人點樣理財，佢話家陣女人工作之餘仲要照顧家庭，無暇去理財，而且好多時銀行都係聯名戶口，應該要開個獨立戶口做儲蓄，即係鼓勵女人儲私己錢咁話。


Bonnie解釋，有自己嘅儲蓄戶口，無論未來發生任何變化，都可以保持財務獨立，維持生活質素。華華都覺得目前香港離婚率幾高，好多嘢真係預計唔到，有多啲錢傍身對自己係有保障啲。


至於點樣儲蓄先啱呢？佢就話應該要「嚴於律己」，定期撥出特定金額，多少唔拘，有額外收入或花紅，可以撥多啲去儲蓄，咁就可以用嚟應急、買新車、首期，退休都冇問題。


另外，女人都要學投資為儲蓄增值，新手可以買基金先；有財經知識嘅，就應該投資一籃子資產，例如基金、債券、外滙等。


儲蓄同投資都學識後，Bonnie建議女人仲要防患未然，簡單啲講就係買保險。雖然Bonnie講嘅，都係阿媽係女人之類，但佢專睇理財額過百萬嘅有錢客，見慣世面，值得參考嘅。

李華華

LiWaWa@AppleDaily.com