職場慧眼：辭職被辭職

【蘋果日報】「Son姐我有急事想請教，最近搵到新工等到公司出埋花紅我就辭職，老闆極力想挽留我。份工其實OK，但我想走好耐，頂唔順老闆成日發脾氣，做嘢睇心情，鍾意乜都冇所謂，唔鍾意就鬧到狗血淋頭，真係好谷氣，所以佢出到比新工加兩成我都拒絕佢。點知佢即刻發神經，話唔接受我辭職，係公司炒我，要畫花我個底，等以後所有僱主都知道我係俾佢炒嘅。咁我依家可以點？明明係我辭職先可唔可以拒絕接受佢炒我？我使唔使話畀新公司知？」
我很好奇想知你老闆究竟幾多歲，如此衝動冇腦兼白痴？你決定走不肯留低是非常極其明智的決定，跟着這種老闆肯定冇前途。
如果你沒有在他挽留你的過程中透露，他不可能知道你新工作的人工，你棋差一着為自己找麻煩了！我相信你不是用辭職作要挾為了更高人工討價還價，但你老闆本來就容易衝動憤怒，可能反過來認定你貪得無厭加兩成人工還不滿意，火遮眼決定炒你魷魚玩殘你，其實戇居居明益你。你辭職要通知公司，他炒你一樣要賠錢。我不知道你們僱傭合約內容要求，以一般一個月通知來說，代通知金還有未放的年假補假，公司炒你就要計到足，炒你之後七日內清數。代通知金賠償等等應該點計可以找勞工處幫忙。
想畫花你個底影響你以後搵工？真正得啖笑！今時今日，被炒被裁員有甚麼值得大驚小怪？莫講你經已搵到新工，即使未，照直講自己辭職反被老闆炒就得，沒有必要隱瞞因為你冇做錯。至於新公司，你一樣應該照直講，除非你已經有其他安排例如先去旅行之類，否則主動提出問新公司有沒有需要，你可以提早上任。
祝你新工作愉快！
張慧敏