【蘋果日報】手機遊戲《旅行青蛙》席捲中港台，掀起「湊仔湊女」熱潮，Google Play下載次數逾100萬。《旅行青蛙》不同於其他遊戲，青蛙與玩家近乎沒有互動，玩家亦付出多過收穫，只能默默等待「獎勵」，無輸贏無分數，看似無所事事，卻反而成為大熱，臨床心理學家解釋此遊戲性質屬「間歇性強化」，得不到反而令人欲罷不能。熱潮消失前，《蘋果》邀請新媒體WHIZOO的兩位網絡KOL Jon Jon和Kovis「尋蛙」，評論「養蛙」感受。
記者梁佩珊
不少人皆羊群心理下載《旅行青蛙》，出於好奇心，卻一玩便停不了，KOL Jon Jon及Kovis亦不例外，「慢慢出現一啲癥狀，一得閒就望下有冇草收」，「會睇攻略同花邊新聞，會睇設計背景，想知成個故事」，但他們指遊戲紅起來，只是港人愛「跟風」，「邊間舖多人排隊，就會個個都去排」。
Jon Jon初期更曾因「阿仔」逾24小時未回家，在ig story不停出帖文尋親，「當時每隔一陣就睇佢返嚟未，到佢返嚟喇，即刻『嘩』，同佢帶好多手信同明信片俾我」，他指心態卻由初期好期待青蛙歸家，到後來由它「鍾意返就返，唔返就唔返」；Kovis則指初期因想要安全感，初期希望青蛙「痴家」，後來希望「阿仔出去睇下個世界」。
青蛙與玩家令人聯想人與人之間的關係，Jon Jon說，應正面看待會出走的青蛙，「愛佢就要放佢出去，唔係綁住喺身邊冇意思，你㩒佢又唔理你，佢出去帶嘢俾你先會開心」。他指會一直玩上癮的人可能是控制慾強的人，「就係想睇住佢會唔會返，某程度係操控」。他認為此遊戲較像父母與子女的關係，「好關心但其實mon（監察）實（子女）」，「會咁樣（長期）mon嘅人，佢真係好悶，正常生活有其他嘢可以mon住」。二人指這種監控只會出現在遊戲，現實如果進行同一行為，「佢被煩到早就走咗啦，邊可以俾你咁做」。
臨床心理學家葉妙妍表示，《旅行青蛙》的玩家不停為青蛙付出，收割三葉草，添置旅行裝備，換來只有等青蛙的消息和歸家，它亦不會與玩家互動，但間中會製造驚喜（明信片或手信），反而令玩家更痴纏玩蛙，因為此屬行為心理學中的「間歇性強化」，不一定得到回報反而能強化玩家的心癮。
「好似付出好多，但回報好少，就係心理學所講，連續性強化和間歇性強化嘅分別，《旅行青蛙》係間歇性強化嘅遊戲，即使做了指定行為，有時有、有時冇獎勵／回報，呢種間歇性強化反而令人更願意做同一個動作，令人做得（玩得）更多」，她指一般遊戲則屬「連續性強化」，玩家做一個指定行為，會立即得到獎勵/回報，反而令人心癮少。
新聞類別
副刊
詳情#
留言 (0)
