新聞類別
財經
詳情#
【蘋果日報】
舊年港交所（388）將中環交易大堂大改裝，變為香港金融大會堂（HKEX Connect Hall），等咗4個月，呢個大會堂噚日趁住大年初五狗年開市開幕喇。一入門口就見到一幅由好多漢字組成嘅「字牆」，牆上嘅字全部都有代表金錢嘅「貝」字，有心思之餘仲好有氣勢！
牆上最少有過百個漢字，絕對係一個學字嘅好地方，有啲字真係好少見。華華一路認字時，發現牆上其中一個字居然係「賤」字，仲有「賊」、「賄」、「賂」等等含貶義嘅字。喺香港金融中心地標出現呢啲字，真係百無禁忌。
港交所︰如金錢帶來禍福難料
港交所就解釋話，佢哋冇參與選擇牆上嘅字，完全交由策展商中國金融博物館設計，但指貝殼係中國最早嘅貨幣，所以有貝字旁嘅漢字大多與貨幣、金錢相關，與金錢相關嘅字，意義不一、有正有反，正如金錢帶來嘅禍福難料咁話。
華華聽完解釋恍然大悟，正如噚日有份喺大會堂主持開市儀式嘅特首林鄭月娥話齋，對未來一年嘅經濟充滿期盼與保持樂觀情緒，但世事常變，投資時都要管理風險。
查實字牆只係大會堂一部份，內裏仲設有「香港金融博物館」，博物館將於下月底開幕，介紹香港金融市場嘅歷史與未來，由紅衫仔（出市代表）捐贈嘅展品亦會喺場內展出，免費入場。
李華華
mailto:LiWaWa@AppleDaily.com
LiWaWa@AppleDaily.com
留言 (0)
