新聞類別
國際
詳情#
【蘋果日報】NBA全明星賽將於周末舉行，好快就可以睇到勒邦占士（LeBron James）惡鬥史堤芬居里（Stephen Curry）。賽前宣傳梗唔少得，NBA派出史上連續出賽場數最多的 Iron Man﹑前湖人球星格連（A.C. Green）到美國洛杉磯機場第7航廈，與大家簽名合照。
駐洛杉磯記者：張紫茵
如果你有眼不識泰山，就要睇睇格連嘅威水史。效力湖人的格連，從1986年11月19日至2001年4月18日，連續出賽1,192場，紀綠至今無人能破，加上當年他曾與「魔術手」莊遜攜手，三奪NBA總冠軍，深受後人尊敬。今年已經55歲嘅格連仍然容光煥發，勁有陽光氣息。
今年的NBA全明星賽賽制與過往不同，將不再以東、西岸形式對賽。投票結束後，東、西岸最高得票的一位球員將成為隊長，兩人可各自按喜好選出自己一隊的另外四名球員，且選人時將不受東、西岸賽區所限。對於今年居里及勒邦占士大戰，格連就笑笑口咁話「我撐勒邦占士，又撐居里，總之兩邊都撐！他們都是好人，很欣賞他們的球技和努力，我現在超期待到時睇場好波！」
不少機場旅客見到格連都超興奮，掉低手上行李去合照留念。今年17歲的錢忠弢是排頭位合照的粉絲，他要搭飛機到三藩市，點知過關後見到格連超興奮超驚喜，雖然格連退役他才出生，但作為NBA迷，他見到格連超強的參賽紀錄覺得好佩服，亦是他打籃球的榜樣，就算天賦唔高，只要保持身體健康，打好基本功都可以努力成為一個好球員。
亦都有旅客覺得格連好面善，所以唔理三七二十一都影相先。前往三藩市的旅客陳先生影完相表示，好鍾意睇NBA，又就知道今個周末是明星賽，但就唔多認得係邊個，當記者話佢知是格連，他就記得，仲讚格連睇落好後生！
留言 (0)
