女童軍領袖：咁改冇意義

【蘋果日報】香港制服團體各有成立背景及宗旨，兩大制服團體童軍、女童軍均起源自英國。有資深女童軍領袖解釋，童軍最早於20世紀初、由英國軍人羅拔．貝登堡創辦，他憑訓練軍隊經驗，發展出一套訓練青少年方法，其後由其妹、妻伸延至發展女童軍。該領袖指出，童軍、女童軍分支遍佈世界各地，全部沿用英式步操、通用性高，「唔應該話香港回歸咗就改（步操方式），咁樣改根本冇意義」。


英式步操通用性較高

中聯辦被揭發邀請制服團體會面，除了要求於五四升旗禮活動上改用中式步操，亦建議長遠改用中式步操。對此，一名資深女童軍領袖認為步操是為了訓練青少年的紀律、團隊精神，採用英式或中式不會影響訓練本意，認為改動是多餘。


該領袖進一步解釋指，英式步操在港的通用性較高，「所謂英式步操，其實有一套通用嘅口令，基本動作不外乎立正、稍息、對齊等，雖然每個制服團體細節上或者略有不同，例如童軍稍息時係將雙手交叉、垂喺背後，女童軍就係雙手交叉擺後腰間，但口令通用性最少有八、九成」。她指出，這套慣用模式有利進行大型、跨團體聯合會操，甚至在國際性的會操或活動都適用。


■記者周　婷