中環在線：有線搵梁淑儀省招牌

【蘋果日報】曾因為想人生下半場精彩一點嘅梁淑儀，喺2012年毅然放棄高薪厚職嘅香港移動通訊（CSL）大眾客戶市場總裁一職，轉做長者安居協會行政總裁。但噚日梁淑儀終於重返電訊界，正式出返嚟做有線寬頻（1097）營運總裁。
當日梁淑儀不惜大減人工3分之2，都要出任年年赤字嘅長者安居協會行政總裁，就係想做更有意義嘅事，幫助扭轉老人家係社會「窮慘病」印象。
可能正正因為梁淑儀喺呢方面做得出色，近年同樣年年蝕錢嘅有線寬頻都忍唔住重金禮聘梁淑儀重出江湖，幫幫手扭轉有線寬頻予人「窮窮哋」嘅印象。
如果擅長品牌形象打造嘅梁淑儀，今次重出江湖，真係可以重新省靚有線個招牌，咁可能真係會成為佢人生下半場最精彩一役。
李華華
LiWaWa@AppleDaily.com