中環在線：金管局幫大學生搵工

【蘋果日報】讀工程、computer science、資訊科技、商業以及經濟嘅同學仔有福喇，事關金管局幫你搵工！話說金管局近年積極鼓勵發展金融科技，噚日就宣佈同香港應科院、數碼港同科技園合作，推「金融科技人才培育計劃2.0」，幫手培育本地科研人才咁話。
金管局助理總裁（金融基建）李樹培話，金融科技發展「勢不可擋」，希望未來五年培育500至1,000名科技人才投身金融科技行業。目標對象就係本港大學生，透過暑期創業營、深圳暑期實習、「空檔年」全職實習以及畢業生計劃，協助同學仔入行。
講到最正就非「空檔年」全職實習莫屬，take半年或一年嘅gap year去參與計劃嘅銀行實習，落手落腳幫手區塊鏈、人工智能等金融科技嘅項目，名額由上屆10間大專院校及70名大學生，增至今屆20間及130個實習名額，喇，梗係反應好先至加碼喇！
李華華
LiWaWa@AppleDaily.com