中環在線：claim保險7仔拎錢

【蘋果日報】多年前有個廣告叫大家要「飛甩老土」，今時今日賣保險嚟講，相信富衛喺呢方面就做得唔錯。
繼首創將旅遊保險卡當Gift card放喺7仔賣，富衛家陣又有新搞作，就係可以喺7仔現兜兜攞成功claim到嘅錢，只要claim唔多過3,000蚊，兼係住院、旅遊及個人意外保險計劃嘅報銷項目就得。
客仔只需下載富衛手機程式，登入賬戶並填取身份證等驗證，登記電話便會收到附有QR code短訊，向店員出示就可提取。
當然大家最擔心都係個人資訊會否外泄嘅問題，富衛香港業務拓展部主管梁鎮業就派定心丸，話公司運用API技術將系統連接，7仔基本上唔會得到以及儲存客戶資料，因此無需擔心泄露個人資料問題。
不過華華都係怕煩，保險agent處理晒claim錢手續兼且存埋錢入銀行戶口就最方便直接嘞。
李華華
LiWaWa@AppleDaily.com