性格孤僻唔鍾意同人接觸陳喬恩被爆連外賣都唔識叫

【蘋果日報】台灣女藝人陳喬恩日前喺台北酒後開車被捕，經檢察官訊問後，依公共危險罪諭令10萬台幣(2.7萬港元)保釋候審，事件引發軒然大波，除了因為台灣向嚴懲酒後駕車者，幾乎達到「沾酒別上路，上路必被罰」嘅標準之外，亦有報道指陳喬恩未有汲取過去酗酒誤事的教訓，對形象造成負面打擊。
陳喬恩事後解釋，當時佢喺屋企飲酒，之後揸車去附近啲餐廳買宵夜，之不過有人質疑，點解佢明知自己飲酒，都要揸車出外而唔叫外賣？據台灣《蘋果日報》報道，陳喬恩身邊嘅朋友話佢本身係一個生活白痴，連外賣都唔識得叫，仲話「她不愛與人接觸，就算去附近便利商店，也會開車行駛社區車道，避開路人眼光。」
報道又引述陳喬恩曾於訪問稱，除非係因為工作，否則其實佢本人係好享受獨處嘅感覺；就算係朋友聚會，佢都唔會勉強自己一定要出席。陳喬恩不擅交際嘅性格，可能因為細個屋企管教得好嚴。試過考試成績唔好，即遭母親狂摑，直到高中畢業之後，母女嘅關係先變好。