「倒樓」到上街　英姐：唔公平就站出嚟

【蘋果日報】「我從來未罷過工。」海麗邨工潮持續第9日，外判清潔工英姐罷足9日，首次上街遊行，「我以前唔敢講嘢，依家好憤怒，經過今次罷工，乜嘢都唔驚，唔公平就站出嚟」。她在海麗邨當了12年外判清潔工，日夜「倒樓」清理垃圾，服務全邨民居，沒想過倒頭來一毫子遣散費也沒有，更被侮辱如乞兒，「我唔會喊，我哋係好堅強」。
海麗邨2005年入伙英姐便開始當清潔工，經歷外判商由工商轉到民順，去年11月再由民順轉回工商。丈夫早年離世，她養大兩子女，日夜「倒樓」逐層清理垃圾，「幾多垃圾都係一個人搞掂」，每年農曆新年前最辛苦，居民棄掉大量傢俬，日搬夜抬；夏天就汗流浹背，「由頭濕到落腳」；年中更無休，「打颱風、年初一都一樣做，冇加人工」。
英姐坦言，原本也是沉默一群，從不罷工，沒上街遊行，「我哋要求好少，應該賠咁多就畀番咁多」。罷工以來，子女支持，街坊也鼓勵她堅持，「總之呢次搞唔搞到都堅持到底」，不擔心被解僱，「咪重新搵過囉」。
玲姐：去林鄭度示威得唔得
同樣遭剝削的玲姐說，清潔工的辛酸是有苦自己知，由朝到晚「倒樓」四次，又要清潔大堂和走廊，多年的辛勞導致手腳勞損。她不敢言偉大，但屋邨的潔淨也全靠他們這班基層工人，用血汗換取卑微的生活，「我哋只係爭取應得嘅酬勞，遣散費都唔畀，係咪好刻薄呀」。
玲姐說，從沒參與罷工和示威，但不忿被無良外判商欺壓，房署任意縱容，卻投訴無門，才逼上街頭。她希望工人能團結一心，抗爭到底，更感謝市民的支持，「如果仲爭取唔到，睇吓林鄭幫唔幫到，去林鄭嗰度示威，得唔得㗎？」
■記者王家文