中環在線：牛氣老闆娘唔教書開餐廳

【蘋果日報】近期唔少新股排隊上市，經營火鍋店「牛氣」、「品越」等餐廳嘅嚐·高美（8371）噚日搞招股記招，老闆同老闆娘就透露自己其實好少煮飯仔，兩位唔只係「讀數」出身，老闆娘陳慧珍仲為咗老公放棄穩定嘅教書工作，陪老公追夢。
公司老闆、即主席黃毅山本身讀會計，太太陳慧珍噚日就話，老公一直都有個「設計夢」，好鍾意設計logo、餐單咁，11年前佢突然話要同朋友夾份喺灣仔開第一間舖，於是陳慧珍就辭埋份工，陪佢一齊追夢，由設計餐單、品牌方向、定位、logo設計都係佢哋一齊諗。家陣公司已有7個品牌，唔知上市後兩公婆仲會唔會一齊諗多幾個新brand呢？
李華華
LiWaWa@AppleDaily.com