紀律部隊爆#METOO女關員巡邏船當值　遭上司禁錮圖性侵

【蘋果日報】【性侵風暴】「呢個陰影抹唔甩，18年啦，仲係好似噚日發生一樣」，香港田徑代表呂麗瑤公開性侵事件激起更多同類受害人發聲，原來性侵事件無處不在，更可能發生在紀律部隊工作間。一名女海關關員向本報投訴，18年前在巡邏船上當值期間，一度遭一名男上司禁錮並企圖侵犯，幸好她逃脫保住清白。性侵陰霾纏繞她多年，至最近才敢宣之於口，「我唔單止希望自己放下，亦想幫到其他女仔，覺得呢個世界仲有公義」。記者：鍾雅宜
這個陰影就如一塊大石，重重地壓在M小姐（化名）心頭足足18年。1999年時僅20多歲的她在海關巡邏船任關員，某日被暫時調至其他巡邏船，沒想過竟是噩夢開始。她指巡邏船一更工作為24小時，上午8時工作至翌日8時，晚上用膳後她回船艙打算休息，卻在狹窄的走廊與在船上任指揮官的高級督察迎頭相遇，行至其休息室門外時，「佢突然間扯咗我入房，再上鎖，兩隻手按住我兩隻手喺牆上」。
M小姐指晚膳時對方曾喝酒，沒想到他竟酒後現狼相，「佢明顯係醉咗，企唔穩，但哄埋嚟想侵犯我，我不停掙扎，最後畀我走得甩」。她形容當時花逾分鐘始能擺脫對方，對她來說相當漫長，對方身形高大，更將身體壓向她，「非禮就一定有，好彩我夠大力，如果佢清醒應該好大件事」。她奪門而出，返回女休息室將門上鎖。她指船上有10多名男隊員，但她屬暫調，與隊員並不認識，故不敢大叫求救，翌日離船時該指揮官卻若無其事，她亦不敢上前對質。
盼鼓勵同行者講出及放下
雖然幸保清白，但事後她性格突變，原是個性開朗的她自此害怕與異性接觸，「好保護自己，同男夥計影相，人哋搭膊頭我即刻話唔好」，亦避免與男關員單獨工作，「一諗起件事就仲係好驚，每個畫面都歷歷在目。」她不敢向他人提起事件，即使後來同事提及對方，她只形容對方是「衰人」，「聽返認識佢嘅同事講，佢當值時經常對女同事言語同行為上唔檢點」。
心事收藏18年，以為已經結疤的傷口，因為「#METOO」運動被揭開。除受呂麗瑤啟發，她亦希望鼓勵同行者，「我好彩冇事，但有幾多同事受過佢幾多傷害冇人知，可能有啲女仔放喺個心度好耐，希望畀機會佢哋講出嚟、放低」。她形容事件發生在紀律部隊「好荒謬，唔係喺酒吧，而係大家着住制服，無法想像呢啲事會喺當值時發生」。
早前她終鼓起勇氣向父母坦白，但暫不打算向海關投訴或報警，因不想影響到家人，對方亦已退休，料投訴作用不大。她承認此舉也許不能將對方繩之以法，但「我俾呢件事纏繞咗咁多年，施害者應該要面對自己做嘅一切，始終呢個世界有公義」。
涉事者：直覺唔會有呢啲事
涉事的海關人員已於近年退休，記者向他求證時，對方只追問女事主姓名、職級等，「你提供多啲資料睇吓會唔會記得？」其後則指「我唔記得啦，太耐」，稱一般上班時不會飲酒，「我相信唔會發生（性侵），我印象都唔會，（即係你唔肯定？）我已經退咗休……我就唔記得啦，以我直覺就唔會有呢啲事發生」。
海關稱無接獲該投訴，任何海關人員若相信受到性侵犯或性騷擾向部門舉報，會按既定程序嚴肅跟進，海關重視人員操守，而過往兩年海關無接獲相關投訴。