中環在線：玖龍「都敏俊」令人心心眼

【蘋果日報】玖龍紙業（2689）噚日股東上竟然驚現一位顏值極高，與韓劇男主角「都敏俊」有8成似嘅少年，呢位「都敏俊」唔係股東，而係玖龍紙業非執董之一。
一問之下原來「都敏俊」係叫張連鵬，係主席張茵外甥、公司副行政總裁兼執行董事張成飛個仔。張連鵬今次出席股東會，唔單止令一眾師奶股東心心眼，連事業女強人張茵都大讚佢聰明乖巧，仲話家陣係時候由第二代逐步出來接班。
張茵話，張連鵬係由低做起，由睇廠房管理生產到公司行政決策都會向爸爸好好學習。
「都敏俊」今次可能因為第一次見記者，表現有些少怕醜，但仍然冧到在場攝影師，讚佢影相擺pose都相當合作，唔似其他某啲管理層二代影相時不情不願。
另外，張連鵬除咗顏值高外，其實成個package都非常吸引，一年可以收取董事袍金人民幣72萬元，平均月薪最少有6萬元，佢今年只係25歲，畢業於紐約大學持有文學學士學位，在美國做過行政、項目管理、會計同企業融資方面嘅工作。
李華華 LiWaWa@AppleDaily.com