「唔畀錢　產品冇人見到」受制網絡霸權焗進貢廣告界：幫fb打工

【蘋果日報】網上廣告大行其道，今年數碼廣告開支更將超越傳統廣告，傳統媒體固然難做，但數碼廣告受制「facebook霸權」，廣告業界形容不少公司只是幫fb打工，就連年收入近億元的100毛亦只能被「牽住鼻子走」。當中五時花六時變的更新令不少用戶均怨聲載道。
記者：梁偉聰
據羅兵咸永道會計師行的報告顯示，去年香港數碼廣告收益逾390億元，已超越傳統廣告，料未來5年的年增長率達6%，到2021年將增至515億元。數碼廣告興起，不等於數碼廣告公司就能「搵大錢」，皆因要屈服在fb的強權下。早前fb更一度想推出「雙軌制」動態時報（newsfeed），沒有付費宣傳的專頁帖子，會被「發配邊疆」。只不過其後反應太大才暫緩，但fb上的自然接觸率（Organic Reach）早已被大大降低。
做「廢青」做到上市的100毛母公司毛記葵涌今年7月申請主板上市，據招股文件披露，截至今年3月底止，毛記全年收入高達9,522.8萬元，按年升73.6%；期內賺3,626.3萬元，按年升61.9%。3位「腦細」當然功不可沒，但成功仍然要得到時勢的配合。
fb淪網上廣告雜誌
本地廣告公司木棉集團助理總監陸偉傑指，近年數碼廣告得以興起的最大原因是「決定budget（預算）個班人開始覺得佢係自己都用呢樣嘢（online media），幾年前啲客會話『我唔知fb咩嚟㗎喎』」。
他提到現時業內情況時稱，「大家都好明一個觀念，『你唔畀錢fb，啲嘢根本唔會見到』，有錢一定有人睇，幾hardsell（硬銷）嘅promotion（推廣）都會有人like，冇錢唔係冇人睇，只係冇咁effective（有效）」。
fb的變化相信一般人都留意到，從朋友分享生活的地方淪為網上廣告雜誌。資深社交媒體策略顧問呂贊柱指，fb10年來做到最好的就是廣告模式「打亂內容次序，今朝會無啦啦睇返噚晚食晚飯啲嘢」。
他舉100毛近兩年咖啡廣告作例子，指出fb的改動，「第一次時啲人洗晒版，我會見到朋友share，但第二次就算好多人share出嚟，就算我日日同呢個朋友傾偈，我見唔到個post，大家見唔到係newsfeed就覺得冇人講」。
其他新平台未成熟
市場上不斷有新平台推出，希望挑戰fb的地位，如Snapchat、Medium等，但仍難敵fb霸權，而騰訊旗下的WeChat亦僅限於中國。陸偉傑坦言，「先不論fb有幾差，但佢個廣告平台真係返到生意，marketer只好繼續用」。其他新平台仍未成熟，「其實係同扔落鹹水海冇分別」。
最後，二人均認為，如今要在數碼廣告上突圍而出，好的內容已非重點，更重要的是要有錢去fb落廣告，才可令內容得到其他人留意，未有新平台出現前，亦只能夠繼續「科水」予fb。
《蘋果》記者曾就業界的不滿及意見向fb查詢，惟截稿前仍未獲回覆。