異動空間：標尾會兩個重點

【蘋果日報】個市打完一輪風，落到20周線（28177）、100天線（28143）後反彈，力度亦似模似樣，應該引到不少人再落場博殺。以黃金比率分析，恒指由30199殺落28134點，共跌2,065點，如反彈跌幅0.382倍，可見28922點，年結將至，想趁反彈減磅，相信仍有一點水位。
無貨想低吸「標尾會」？魏力不會反對，但策略仍是取大不取細，特別是今輪跌市所見，中小型股「升就無份、跌就嘔凸」，上日北水反攻，主力都只係掃騰訊（700）、匯控（005）。炒股無得拗頸，一定要跟資金走，堅持要買細股博jackpot，只是跟自己荷包過唔去而已。
2017年尚有十多個交易日，投資成績大局已定，魏力也已將今年利潤提走，花一點獎勵自己，令明年更有動力再博殺。年尾多人放假，市況雖然未必靜，但市場深度一定差一點，大戶更易舞高弄低，為免「臨尾香」，只宜小注出擊，當保持市感及手感就算。
如無意外，美聯儲本周將再加息，收水是明年大方向；本港拆息升穿1厘並企穩，土炮地產股全線走弱，反映資金有外流之勢。外資回流美國之際，明年個市要再上，北水力度將是關鍵，佢哋買緊乜，點可以唔跟？
魏力
http://fb.com/2012jason
本欄逢周一、五刊出