網民怒轟吳尊晒Max除褲去「噓噓」相

【蘋果日報】吳尊早前同一對子女Nei Nei及Max上內地真人騷《爸爸去哪兒5》，囡囡Nei Nei乖巧聽話，囝囝Max又精靈可愛，深受網民歡迎，吳尊喺節目中嘅好爸爸形象相當討好，人氣高企，微博粉絲人數急升。
吳尊前日為慶祝微博粉絲破600萬人關注，晒出4歲Max除褲去「噓噓」嘅背影，當派福利，留言「給你們看你們想看的慾望」，相中見影相地點疑似喺公廁，Max身邊仲有一個阿伯似係正在如廁，原圖嘅路人冇打馬賽克，
惹嚟網民好反感，被網民鬧爆，一個小男孩嘅屁股，再配上「慾望」兩個字，又牽涉到路人阿伯嘅私隱，吳尊隨後刪除呢個留言，唔少網民指為人父母應該把關小朋友嘅私隱，吳尊之前已經試過出事，佢喺7月分享父子去「全裸沙灘」，Max除晒衫以手遮住「小雞雞」，吳尊就只着褲，用貼圖遮住重點部位，令人產生錯覺，以為佢係裸體。
此外，幾年前帶當時3歲嘅Nei Nei上親子真人騷《爸爸回來了》喺鏡頭前幫Nei Nei沖涼，Nei Nei正面背面冇遮冇掩，播出嗰陣，僅以特效遮住囡囡下身，之前已經引起爭議。