中環在線：賭王親戚睇中手遊開發商

【蘋果日報】「澳門線上賭場真係要上線喇！？」今日開始招股嘅網頁與手機遊戲開發商遊萊互動（2022）竟然得到「賭王」何鴻燊家族成員孫詠霜入股，公司主席陸源峰仲話，公司有能力幫澳門傳統行業接駁線上平台，而且「有合作前景嘅潛在空間」。唔通意味將來可以開線上賭場？
噚日孫詠霜都有出席記者會，可能因為家族基因太勁，唔使多講都已經知道邊位係佢。而根據招股文件，今次作為基石投資者一共有3個人，包括中國手遊創辦人王永超、孫詠霜同埋佢配偶何劍鋒，分別認購300萬、100萬同200萬美金。招股書與公關大員都冇透露，呢位孫女士到底同賭王係咩關係，只強調佢係家族成員!