中環在線：上市公司主席email劈炮

【蘋果日報】家陣啲老細成日話年輕一代冇乜規矩，舉例，後生嘅員工辭職唔do，畀個email或者whatsApp就算，但原來上市公司主席都係畀個email就劈炮㗎。
講緊係幸福控股（260），呢間公司主要股東係中航國際，上月初先至被委任為非執行主席嘅任煜男（律師出身），早幾日畀咗個email幸福控股，話辭任非執主席。
佢喺email寫明「除此電郵之外，不會就辭職事項簽署其他文件」。
佢似乎仲係憤而辭職，因佢email內指「本人自被董事會任命並公告為董事起，逐步瞭解到公司的財務狀況，致力推動融資，解決日益惡化的現金流和流動性情況，並加強對外溝通，保障公眾股東權益。」
「本人對公司管理行政能力表示失望，對個別董事股東阻礙公司董事會正常運營的無賴無聊無知行徑表示失望。」佢仲話，保留向公眾、監管機構、相關國資紀檢部門表達態度、滙報情況嘅權利。
證監會最近出晒力打老虎，見到呢個通告，應該搵人做嘢喇啩。
李華華
LiWaWa@AppleDaily.com