科技透視：港產智能眼鏡誓進軍全球

【蘋果日報】「人生有幾多個十年」，有人去賺錢買樓，亦有人選擇去創一番大事業。智能眼鏡公司MAD Gaze創辦人鄭文輝是「80後」，畢業後短短第一個十年已試過創業成功，但他賣掉賺錢的程式公司，用2,000萬元身家「瞓身」再創業。
過去創業成功未令到鄭文輝感到滿足，他稱：「之前嘅公司一直都只係local business，就算做到香港第一，其實市場都係好細。要衝出香港好難，我做咩先可以衝出去呢？」
鄭文輝發現智能眼鏡或許可以打開缺口，當他想設計一款應用在Google Glass的應用程式時，發現Google Glass竟然問題多多，如用電量大、外形醜陋、屏幕太小、笨重等。因此他決定自創智能眼鏡品牌「Mad Gaze」，希望可率先創出可進軍全球市場的智能眼鏡品牌。
找到新方向後，鄭文輝立即着手研發，但第一代Mad Gaze智能眼鏡因技術尚未成熟所以銷量有限。幾個月後改良推出第二代產品，售價由2,399元，增加逾一倍至4,999元，銷量增至2萬部，並開始在豐澤等大型連鎖店售賣，錄得約6,000萬元收入。
第二代產品漸見成績，Mad Gaze急不及待推第三代產品，「第二代啱啱賣咗幾個月就做第三代，做第三代時就開始研究第四代」鄭文輝表示，在同行已經在參考其第二代智能眼鏡時，「如果我哋自己唔行快啲，出第三代，就有機會俾人打低」。
投入4,000萬研發第三代
持續改良產品亦令研發成本越來越高，第二代產品花費1,000萬元研發，到第三代時已增至4,000萬元。鄭文輝坦言，現時資金缺口最大，因第二代產品仍未回本，就要再投入數千萬元，不少投資者提出質疑。
鄭文輝卻相信，第三代產品可打入大眾市場，為籌集研發第三代產品的資金，鄭文輝積極尋找投資者，前路充滿挑戰，惟他無悔全情投入做Mad Gaze智能眼鏡，「我哋可能一世只有一個咁嘅機會去做到全球都知嘅產品，我都係希望全世界識智能眼鏡嘅人，可以講得出Mad Gaze呢個牌子。咁我哋就有最大嘅滿足感。」
記者：彭崇強