智取大市：全民皆股已殺到

【蘋果日報】今日有個從冇交流過股票嘅非財經同事主動同我講股票，無可否認，全民皆股已經殺到。當壞消息睇，代表升浪到尾聲；當好消息睇，就係多咗弱嘅對手進場，呢一刻更易贏錢。熱門新股雷蛇（1337）上市第一日就插，易鑫（2858）上市兩分鐘就開始隊，新股已搵唔到食，但撩起新丁團火，點都要買吓強勢大藍籌先安樂，偏偏遇到11月下旬至12月底嘅蜜月期，港股又似乎未見頂爆煲，呢鋪好玩咯。
只係一日調整，港股又升過，平保（2318）大幅爆上破頂，氣氛返晒嚟，距離對沖基金年結只剩7個交易日，暫時維持年底前港股繼續炒嘅預測。不過今日仍有二三線股洗倉，例如港口股因為發改委指涉及《反壟斷法》而急跌；首都機場（694）遭高盛唱淡又插7%。以為科網股搵落後股就得，美圖（1357）傳京基減持，又唔見8%。所以大家要審視自己個倉，持有牌面唔太差但股價依然弱勢嘅股就要考慮換馬。人氣大價強勢股的確有好處，例如騰訊（700）大行、基金個個有貨，冇人想佢衰，你想出份唱淡而有人理嘅大行報告都難。日日千二億成交，亦夠錢炒起大價股，波幅亦有擴大迹象，好刺激。
晉佳
http://fb.com/advanceguy1
本欄逢周一、三、五刊出