中環在線：鄭志剛搵LOQI設計潮袋

【蘋果日報】環保有意義又係近年大潮流，華華出街shopping時，都會自備一、兩個環保袋旁身，盡量少用膠袋；加上近年唔少環保袋設計有特色得來又夠潮，真係攞嚟襯衫都唔會失禮。向來熱衷藝術嘅新世界（017）副主席兼總經理鄭志剛（Adrian），佢嘅團隊最近就搵嚟德國品牌、專幫博物館設計環保袋嘅LOQI，幫新世界整咗個靚袋，上面印住集團嘅motto「Collect, Connect, Collide」，都幾精美同實用，一啲都唔hea。聽講早排新世界舉辦維港泳時，就免費派畀嘉賓同選手，獲得唔少好評。
如果去旅行有行開博物館嘅朋友，應該對LOQI唔陌生。事關呢個品牌經常同世界各地唔同博物館同藝術家合作，製作色彩繽紛又有特色嘅環保袋，主要行高檔路線，一個差唔多要賣成100蚊港紙。聽聞新世界今次係主動搵LOQI合作，而LOQI亦知道Adrian向來支持藝術，雙方一拍即合，為新世界設計咗呢款灰藍色環保袋，Unisex男女都用得。唔知下次Adrian又微服出巡到旗下樓盤睇賣樓時，會唔會見到佢用呢？
李華華
LiWaWa@AppleDaily.com