【周身不痛】人魚線已Out最like「爸爸肚」？港女醫生Say NO！

【蘋果日報】人魚線已Out？網絡最近出現新詞「Dadbod」（爸爸肚），介乎啤酒肚與健碩之間、有少許肚腩的「爸爸身材」，像荷里活影星里安納度‧迪卡比奧常被拍到「凸腩」照，又說是女生認為這種身形有安全感，亦有人喜歡站在男友身邊時顯瘦。不過，《蘋果》隨機街訪的女生仍傾向健碩身形，「唔鍾意肚腩凸出嚟」。其實，肚腩反映身體脂肪積聚，暗藏健康風險。家庭醫生建議留意自己肚腩尺吋有否逐年遞增；若要減肚腩，最簡單是「食得聰明啲」。
記者　袁樂婷　盧珮瑤　羅繼盛
公民黨立法會議員譚文豪，年中與楊岳橋等黨友一同「削肉救黨」，期間露出小肚腩，被黨友戲稱為「桶豪」。譚接受《蘋果》訪問時指，自己一向「瘦底」，加上學生期間都有運動，最Fit時腰圍只有28吋，體重120磅，但隨着工作忙碌，肚腩終於在5年前出現，「初時仲好興奮，話終於都冇嘥米飯」。到今年中參加「削肉救黨」時，腰圍已增至約35吋，爸爸肚已育成，體重亦達173磅。
譚文豪說，做機師要經常坐在駕駛室，「特別係長途機，坐喺度冇嘢做就會食啲小食，就好容易肥」。他也喜歡吃快餐和飲汽水，「每日都要飲一罐可樂，KFC、麥當勞都每星期食一、兩餐。我係全面唔偏食，亦冇戒口。」
為了家中小朋友，加上為黨獻身，譚文豪終於開始減肥，「都好難日日做運動，但的確做多咗，依家每一兩個星期都做一次運動，好似單車、游水」。他認為注意飲食更重要，現時每月只飲兩罐可樂，又戒飲凍檸茶，轉飲凍檸水，腰圍減至32吋，西裝都比之前鬆身，「見到小朋友仲細個，都希望見證到佢哋唔同嘅時刻，唔好成為佢哋嘅負累。所以保持健康最重要」。
外觀也重要，部分受訪女士都不如網絡所述追捧爸爸肚，李小姐坦言「唔好睇」，也有的認為「唔健康」，但若男伴長胖得了爸爸肚也會無奈接受，不會「嫌棄」他。
家庭醫生鄭志文說，肚腩反映脂肪積聚在腹部，主要因吸收過量的卡路里，超過身體需要消耗的份量，例如高熱量飲食、少運動，「咁佢（卡路里）就要搵地方擺，一般會擺喺皮下脂肪，最常擺嘅位置就係肚腩」；肚腩同時反映內臟脂肪多，特別在肝臟周邊，或造成脂肪肝。他稱，部分人因遺傳因素，特別容易吸收和儲存卡路里，需更加注意生活習慣。他說，肚腩除了「唔好睇」，亦有潛在健康風險，增加患上糖尿病和心血管疾病風險：「（風險）唔係冇得逆轉，當佢減咗體重，風險又會減低返」。他稱，最簡單方法是「食得聰明啲」，例如減少吃碳水化合物、高糖份和油炸食物等，多吃蔬菜。
肚腩是否常見？鄭志文說，臨床見到體重過重的人越來越多，政府和大學的統計數據，亦見學童自小已有BMI超標問題。他說，若只有小肚腩，其他指標也正常，暫時不必擔心，不過就要留意腰圍尺寸的趨勢，「有冇每年加一吋」，如「走勢遲早超標」，便應及早調整生活習慣。