中環在線：火鍋送上門　唔包最重要嘅……爐

【蘋果日報】一年容易又冬天，聞說下星期氣溫又急降，凍冰冰最啱打邊爐啦。近年內地都推咗好多一人邊爐連埋盒，方便大家係屋企「毒」食。今次南記就醒嘞，唔單止好似往年咁推出外賣火鍋包，今年孖埋UberEATS推外賣服務，送埋上門，不過只限UberEATS原本服務區域。
南記今年有新搞作，除咗傳統嘅清湯湯底外，仲新推咗蕃茄同麻辣湯底。最平半份講緊百零港紙，就已經有齊12安士肥牛、5片魚片、9條招牌春卷等等9樣嘢食，足夠2至3人食，圍開每人都係50、60蚊左右，如果叫埋UberEATS送到上門都係加多20蚊，真係幾抵喎。
不過留意番，南記呢個火鍋包就只會包湯底、食材同埋辣醬，係唔包爐嘅！所以打完邊爐都係逃不開要自己洗煲嘅命運。
李華華
LiWaWa@AppleDaily.com