中環在線：財仔發達太太搵「David Wet」推押股業務

【蘋果日報】典當手袋借錢而聞名嘅財務公司發達太太（Yes Lady），近排開拓押股業務，仲搵咗人扮股壇長毛David Webb，拍咗個電視廣告，叫人去押藍籌股同細價股，都扮得幾似架。
廣告係一位名銜頭係「蠱評人」、名字叫David Wet嘅人，同人講唔止藍籌股，細價股都押得，1萬蚊每日平息係低至9.8元，不過正常David Webb係唔會亂叫人借錢嘅。
華華搵咗發達太太總經理董健詩（Priscilla）問，佢就話之前主力sell手袋典當，近排想搵啲噱頭就拍咗個廣告放喺大台。至於押股業務，Priscilla話佢哋押藍籌可以借最多八成，利息12厘至30厘不等，貸款期就1年到。
至於細價股可唔可以押呢？Priscilla話就算冇成交，都可以借到起碼一成，唯一係停咗牌唔會接受。咁如果借款人還唔到錢、股票又中途停牌呢？就等間公司復牌再拎出去賣囉。
李華華
LiWaWa@AppleDaily.com