當年潮聯申禁令　今日紅Van續「佔領」

【蘋果日報】政府高官於2014年10月21日與學聯對話，試圖化解佔領僵局。不過未待雙方會面，潮聯公共小型巴士有限公司及兩個的士業工會於對話前一日，分別入稟法院申請禁制佔領旺角，警方及執達吏11月底執行禁制令清場，衍生本案。清走佔旺人士接近3年，旺角通菜街馬路依然擠迫，原因正是當年入稟的潮聯旗下紅色小巴非法泊滿3條行車線。
記者昨日重臨旺角通菜街，20多架紅Van泊滿3條行車線，但事實上運輸署只批出一條行車線予潮聯停泊小巴。21歲的侯先生指潮聯多年來一直阻街，「佢自己咪又係霸住條街，想過馬路都有十幾架車喺後面穿插」。他認為政府的阻街定義如搬龍門。
市民斥明顯選擇性執法
任職護士的范小姐讚佔旺人士雖然犯法但勇敢，承擔法律責任是公民抗命一部份。對於潮聯多年阻街，「隻眼開隻眼閉，明眼人睇得出係有問題」。她認為，若因為示威原因而阻街，犯法入獄無可厚非，「但另一方面有人阻街，仲要阻晒3條街，咁多年都係咁，但又冇任何法律責任，好明顯係選擇性執法」。
車站站長陳先生（化名）表示，紅Van霸佔3條行車線已成慣例，「我都叫佢哋走，不過佢哋喺度咁耐，唔聽我講都冇辦法，都試過叫佢哋唔好擺喺第三行……有啲嘢管唔到就係管唔到」。談及當年潮聯入稟法院申請禁制令，他僅稱「唔知點解公司當時會有咁嘅決定」。
以生計受損等為由入稟
回帶到2014年10月20日，潮聯、香港計程車會及的士司機從業員總會代表入稟，以營運受阻、生計受損等理由，申請禁制佔領旺角多條街道。高等法院緊急聆訊後批出臨時禁制令。10月22日下午有反佔領團體到旺角清除佔領區內障礙物，晚上更有暴力場面，不過佔領者繼續留守。
高等法院於當年11月10日宣佈接納潮聯等團體申請，延長臨時禁制令，並授權警方在執達吏被妨礙清場時採取拘捕行動，及盡早將被捕人士帶上法庭；同月25及26日，執達吏及數千警力清場，拘捕逾百人，律政司其後分兩批控告其中37人刑事藐視法庭。
■記者梁銘恩、勞東來