「美食沙漠」起餐飲商場百利保話要餓多陣

【蘋果日報】馬鞍山係「美食沙漠」嘅同義詞，年初百利保（617）同富豪酒店（078）就話喺保泰街嘅商場，有望趕及今年聖誕節前開張，主打飲食，勢成為沙漠中嘅一片綠洲。不過噚日喺商場公佈命名儀式上，發展商就改口話，商場最快要到明年第一季先揭幕，OMG！


商場噚日命名為We Go Mall，總樓面約16.4萬方呎，已經批咗入伙紙。百利保執董范統指，有一半樓面已經租出，確定咗會有間佔地兩萬方呎嘅酒樓、台式餐飲、冰室同埋意大利菜品牌進駐，家陣仲有日韓料理傾緊租，希望We Go Mall最終有四成到五成樓面喺飲食。至於確實有乜餐廳，范統死都唔肯講嘞。