騰訊舊部做御藥堂執董

【蘋果日報】提起御藥堂（932），大家通常醒起米雪嗰句「藥箱都變成首飾箱」，呢個藥箱，新近委任咗年僅30歲嘅廖喆做執行董事，仲同股王騰訊（700）有啲關係。


睇番通告，呢位廖喆曾經喺騰訊旗下負責管理遊戲工作，同埋喺一間叫財付通嘅公司管理微信支付工作。


咁啱御藥堂係今年7月使咗2.7億收購一間公司七成股權，而間公司主要係向呢間財付通提供微信支付境外解決方案。廖喆去到御藥堂就係負責線上與微信支付境外解決方案等業務。


御藥堂早前亦已經同廣東華城信息科技簽署合作，共同營運「騰訊．大粵網」香港站，呢個騰訊．大粵網由騰訊同南方報業集團成立。成件事好玄囉。


通告話，廖喆3年收取240萬董事袍金，除開每個月6萬零蚊，都唔算貴。睇嚟今鋪御藥堂唔只想幫人將藥箱變成首飾箱，想行埋無現金路線㖭喎。