中環在線：賭后都要呻一呻

【蘋果日報】講起澳門，賭場一定係第一時間諗起嘅地標。之不過，信德集團（242）行政主席何超瓊就似乎唔多同意「澳門淨係得賭」嘅諗法。噚日佢出席經濟論壇時順便發吓牢騷，有啲嘢屈住喺個心好耐，睇嚟賭后好多嘢想講！
作為賭王二房長女，1995年何超瓊就加入信德集團做執董，佢話，好多項目香港同澳門要合作做，但經常會見香港官員時，佢哋似乎覺得澳門淨係可以提供博彩方面嘅經驗同人才。何超瓊話，其實澳門擁有綜合旅遊設施，除咗博彩，「仲有好多嘢可以提供」。
何超瓊之後又提到當年個個醉心賭業時，澳娛率先做非博彩設施──2001年建澳門旅遊塔，後來廣州塔開幕時，更獲對方邀請幫手頭一兩年管理，反映澳門可輸出非博彩業嘅經驗，唔係只得賭咁單薄。
李華華
LiWaWa@AppleDaily.com