Can Bank：宣讀施政報告重質不重量

【蘋果日報】特首林鄭月娥將會在本周三（11日）發表其首份施政報告，有消息指林鄭今次宣讀施政報告時間將會大減至不會多過一個小時，今次施政報告將會是一篇演講，唔再係讀報告，目的係令發言更聚焦。
眾所周知，施政報告並非甚麼潮文小說，可讀性有幾強，大家心照。事實上，上任特首在過去幾年在立法會宣讀施政報告，時間長逾兩個鐘，單計42次一帶一路，以平常一秒鐘三個字的演講速度，已經需要成分鐘，仲未計「政績」分享部份，七除八扣之下，宣讀內容裏有幾多內容真係市民關心？
就算只計推動政策部份，亦非每項政策均對每一個市民有影響，再配合特首以官腔宣讀，即使坐在議會大堂內各專業嘅議員，部份都聽到神遊太虛，更何況真正坐在電視前聽特首宣讀施政報告市民？聽完十個有九個都會迷失咗。
所以只宣讀內容重點，某程度上是好事，有傳今次重點將會是土地、房屋以及創新科技，三項都有一定爭議性，所以宣讀內容必須要踏實，否則又會被認為是避重就輕，以減少宣讀時間避開某些議題或承諾，總括而言，減少宣讀時間是好是壞仍需視乎林鄭周三發表內容會否能真正重質不重量。
散子