【錢銀實驗室】「女上司比男上司易服侍」市民激辯爆seed

【蘋果日報】正所謂人人都有「波士」，但並唔係人人都係「好波士」。日日坐喺Office猶如玩緊鬥獸棋，今日我哋破天荒探討一下首個辦公室兩性議題─女波士比男波士容易服侍嗎？
據聞有啲女波士情緒起伏極大，上一秒笑面迎人，下一秒爆口大罵；不過又有人撑女波士做事較認真嚴謹。我哋一於走出旺角街頭，聽聽蘋民點樣講！
論點一、細節好重要
譚先生：「比如啲文件，字型幾大、要幾多line spacing、咩顏色、要print幾多、雙面定單面，女上司都係好有要求！男上司反而冇，總之你印到份會議紀錄出嚟就okay。」
論點二、異性相吸
何小姐：「男上司可能見到你係女仔嘅時候，要求或是工作量都冇咁多；女上司相比起就冇分別，因為異性有相吸呢，咁女上司對男同事好啲，或者工作量低啲、寬鬆啲。」
論點三、口不對心
潘先生：「可能要估埋佢諗咩囉！女上司都係暗地裡會發脾氣，佢（表面上）可能會做到咩事都冇咁樣，照樣話okay唔錯，但入面可能有10萬枝箭插埋向你！」
論點四、易心煩氣躁
譚先生：「逐樣逐樣同你講得好清楚，咁你都要收得好清楚囉，再問佢就覺得煩架啦。」
總括而言，學梁小姐話齋：「上司、下屬都係一段關係，如果你覺得個上司唔夾你，你都可以選擇第二個上司、打第二份工！」
完。