【全城悼念】莫可欣獲輝哥提點

【蘋果日報】化妝大師陳文輝前晚被癌魔帶走，與他合作過的小生、花旦及港姐都非常惋惜。
莫可欣：
聽到呢個消息，好愕然！我記得佢同我講過條眉好粗，會好惡，叫我整疏啲，佢仲話要中間拔走啲眉毛。
楊思琦：
輝哥喺港姐時睇住我哋出道，佢會指導啲同事化妝，佢個人好好、好親切，會問候我哋啲後輩，就算佢退休有時係九龍城撞到佢都會傾偈，希望佢一路好走。
邵仲衡：
當時我係銀河十星，TVB指定輝哥化邊幾個，有啲大騷都係輝哥同我化妝，俾輝哥佢親手化過等於一種榮幸。佢入到化妝間好有威嚴，又有氣勢。
譚耀文：
我好榮幸有拍劇時俾佢定妝，佢工作好認真，化妝技術當然唔使講，佢離世好可惜，輝哥算係香港藝術界傑出人士，好值得尊重，祝佢一路好走。
陳浩民：
輝哥嘅離開係化妝界一大損失，有幸喺無綫服務嘅時候都畀佢幫我化過妝，最鍾意佢同我化嘅「美猴王」，佢係一位慈祥前輩，希望佢家人早日走出傷痛。
譚小環：
選完港姐冇耐，我哋當年新人好少由輝哥化妝，有一次好幸運由輝哥操刀同我化，真係大師級水準。
周慧敏：
我拍劇唔多，但偶爾喺化妝間見到輝哥，都感到輝哥大師級嘅氣魄同風範。陳先生走咗，係香港藝壇嘅莫大損失，願佢家人節哀。