滅村前橫洲百村民最後團圓

【蘋果日報】中秋節不一定代表團圓，對明年初將被逼遷滅村的橫洲三村村民來說，今年是最難過的中秋節，但亦可能是最熱鬧的中秋節。近百名村民首次聚首一堂，分享自製愛心食物，過一個城市罕見的鄉村式大食會，永寧村陳村長着大家放下愁緒，許下卑微的中秋節願望，「最希望不用走，年年再開party！」
將於明年一月被政府收地的橫洲永寧、鳳池和楊屋新村村民，近年因共同對抗政府收地而常聚會，陳村長更首辦中秋村聚會，各戶準備食物，有近百人出席。村民歡度中秋之餘，心情亦格外複雜。鳳池村村民黃先生一家四口居於該村13年，今年度最後一個八月十五特別難過，近年整條村都死氣沉沉，「好似有一日過一日，倒數緊咁，心情好似就斷氣。」
黃先生指在鄉村過節特別有氣氛，一家六兄弟姊妹會入村度節，因地方夠大適合小朋友玩耍，「十幾廿人圍埋一齊食嘢，特別有氣氛，若果將來上咗樓，唔會再有咁大地方一齊過節。」他續說，特首林鄭上場時曾期望她會與村民對話，但對方拒絕會面，「心情就好似過山車咁，希望又再落空。」
轟林鄭CY壓迫村民
去年喪母的高女士首次過失去至親的中秋，「好唔習慣，少咗個親人好傷感」。她指過去母親與她的兄弟姊妹會一家十多口燒烤過節，但日後遷出永寧村將此情不再。
居於永寧村70年的黃伯，幾乎年年與子女孫兒四代同堂過節，有大花園供小朋友玩燈籠、點蠟燭，想起中秋節逸事猶有餘悸，「試過啲小朋友喺花園煲蠟爭啲發生大火，諗起都好驚。」他批評「林鄭係妲己、CY係秦檜，壓迫村民。」但他不會屈服，「預咗俾佢抬我走。」今年他以親手種的大蕉蕉花炒蛋，自製特色菜公諸同好。
■記者鍾雅宜