【馮仁昭四圍超】黎姿46歲黃仙子　同蛋糕撞色

【蘋果日報】凍齡人妻黎姿噚日46歲生日，佢為胞弟黎嬰打理嘅醫學美容公司同事，特別送上黃色蛋糕，咁啱壽星女又着嬌艷黃色裙，襯到絕一絕！黎姿喺社交網貼相並留言：「今年生日收到了一份驚喜，同事們預備了蛋糕，唱着生日歌為我預祝生日，開心又感動。謝謝你們一直這麼愛錫我，感恩有你們一直在工作上同行，這是我的福氣，謝謝你們。」
興奮打拍子
其公司官網仲上載短片，黎姿見到蛋糕開心到掩嘴而笑：「咁靚嘅，多謝。」同事唱生日歌時，黎姿仲興奮打拍子，佢話：「多謝我嘅同事記得我嘅生日，我好開心好感恩，今日食咗個黃色生日蛋糕，好襯我件衫，多謝。」網友紛紛留言祝福：「女神生日快樂！」、「我的仙女，黎姿，生日快樂。」
出身公屋嘅黎姿，14歲拍戲養家，04年憑劇集《金枝慾孽》奪視后，創事業高峰，直至胞弟遇車禍致癱瘓，黎姿退出娛樂圈代弟打理公司，08年嫁富商馬廷強，現育有三女。今年黎姿成功將公司上市，以掛牌後嘅最高股價，當時黎姿身家暴漲至逾15億元。