移居做blogger　尋獲真自由港女戀上冰島的慢

【蘋果日報】每年10月開始，都是酷愛旅遊港人計劃遠征北歐追逐極光的旺季。對於港女阿丹來說，極光是不用追訪的，抬頭仰望即是，兩年前移居冰島的她，甫踏進這個冰冷的國度便不能自拔，愛上冰島的慢，戀上冰島人的與世無爭，尋獲她心中的真自由。
記者：蔡元貴
大約5年前，劉月丹留學英國修讀傳播學碩士。現年25歲的阿丹畢業之後嘗試在冰島搵工，碰巧一間旅行社招聘懂中文的網絡寫手，阿丹順利獲聘，就這樣在與香港相距接近一萬公里的冰島留下來。
自稱「冰島港女」的阿丹是全職blogger，為旅行社撰寫旅遊攻略與景點推介文章，藉此招攬團友。從繁華的亞熱帶飄流到冰冷的北歐島國，港女反而覺得自己找到烏托邦：「覺得呢個環境好舒服，各種節奏都比較慢，反而返香港覺得比較辛苦，或者係節奏太快。」
有人工作3年夠錢買屋
「好簡單，你行路，喺香港你行慢啲都會被人『jip』㗎嘛，喺supermarket買嘢企喺度揀，阻住個人，人哋會『jip』，但係呢邊完全唔會」。阿丹說冰島人特別簡單，這是她喜歡冰島的原因之一：「喺冰島可以真係搵到自由，無論你係乜人，性取向係乜，嚟自邊度都可以獲接納，唔需要擔心人哋點睇。香港雖然好多人話係自由社會，但係依然存在唔少因為身份、地位或者其他各種因素而產生嘅分歧，喺香港生活壓力非常大。」
讀到這裏，是不是很羨慕這位冰島香港人？未算，冰島吸引阿丹的另一點，是置業夢想沒有香港那般遙遠：「普遍嚟講，冰島嘅人工都係高嘅，喺度搵呢度嘅錢，喺度使，係一定夠你開銷，儲錢係有可能買到屋嘅。我有同事喺度做咗大概兩、三年左右，佢今年已經買到自己嘅屋，係靠自己、完全冇靠屋企。但係如果我返香港，衰啲講我一定要靠屋企，或者係靠其他人先可以自己搬出嚟住。呢度樓價唔係好貴咋喎。依家市中心假設有人賣嘅話，大概都係五、六百萬港紙左右可以買到間屋。」
阿丹還未算是冰島人，她需要在這裏住滿4年才可申請入籍。移民冰島並不容易，她解釋，冰島沒有投資移民這種途徑，「只係可以喺度做嘢，跟住喺度攞簽證，或者係同冰島人結婚，最主要都係呢兩種方法，可能最早最早嗰批中國移民，據我所知就係冰島人請嚟喺餐館做廚師，之後搵到錢就自己開餐館」。
冰島氣候並不宜人，最難適應是突如其來的強風，「佢嘅風係四面八方喺唔同嘅方向吹襲埋嚟。有好多遊客落車唔記得閂門，個風一嘢就將車門反轉。我自己試過去行山，上到山頂啲風超級大，係完全企唔到，我係幾乎喺個山頂坐住咁落山，好驚」。
驚還驚，阿丹似乎還是愛冰島多於香港，「香港依家嘅感覺同細個嘅感覺已經唔太一樣，或者係因為大家都開始有咗生活嘅壓力，亦需要適應社會嘅節奏，同以前讀書嘅時候比嘅話，冇咁美好」。人，總是嚮往美好的。