回歸前的香港網劇《反黑》卡士極奢華

【蘋果日報】講到香港電影電視，警匪片一向都佔有好重份量，特別係自從《無間道》揚威國際之後，傻強一句金句：「當一個人好唔專心咁做緊一樣嘢，而佢又望住你嘅話，佢就係警察。」更加成為做卧底嘅指標，卧底片更加係長拍長有，連大台都拎嚟做台慶劇，既然香港嘅警匪江湖片咁出位，吸引到世界各地嘅資金嚟拍港式警匪片就緊係好合理啦。
好似由喺《三五成群》飾演過廿八座大王嘅宋本中執導，同陳國坤一齊做監製嘅網劇《反黑》咁，就係由大陸投資六千萬製作，仲以Youtube作為平台免費開放俾全世界睇，當然大陸方面就會有一個專屬網站啦。講返套劇就犀利喇，劇中包括咗全香港九成擅長飾演江湖大佬或者警察嘅演員，卡士夠晒勁，好似有大佬B吳志雄、陳惠敏、吳孟達、陳小春、盧惠光、吳岱融、陳欣健、林嘉華、吳毅將、吳家麗、黃樹棠、河國榮、黃柏文、張建聲、陳國坤、王合喜、李璨琛、湯怡、鄭希怡等等，真係數都數唔晒。
卡士咁勁，又拎大陸資金拍，仲講到明慶祝主權移交廿年，咁其實講咩㗎呢？故事背景設定喺97年之前嘅香港，故事講述由80年代起陳小春走去做卧底，破案後喺90年代回歸警隊嘅故事，當中有大量非常港式嘅黑社會同警隊元素，張建聲飾演癲喪反派嘅演技亦令人眼前一亮，劇集由22號起以每日一集嘅形式喺Youtube播放，當中有唔少向港產片致敬嘅場面，例如有一幕由陳小春、李燦森、宋本中、梁烈唯四位都飾演過山雞一角嘅演員一齊打麻將。
不過雖然係大陸投資，但係到目前為止劇中有唔少暗示元素似乎意有所指，而佢作為一部以YouTube為平台嘅網劇，唔知點解喺YouTube上竟然鬧雙胞，有兩個頻道同時都有定期更新集數，唔知會唔會影響到套劇嘅收視，不過據《反黑》官方facebook公佈，《反黑》用咗三日就破億點擊，相信有唔少都係大陸網民嘅功勞。