回頭是愛 吳若希年尾註冊鋒菲復合驚動中港台

【蘋果日報】愛情嘅嘢話唔埋，早幾個月話分手，戴夢夢日前又俾人見到同朱翰博（Ricky）撐枱腳，食食下飯仲伸手摸Ricky塊面，用行動話你知，復合可以好簡單。
咁復合有幾易呢？好似鄭秀文（Sammi）同許志安喺91年開始拍拖，多次離合，正式喺04年分手。最終兩人喺11年復合，更傳過喺峇里結婚，直到15年許愿同佢哋飯聚後，獲許愿證實Sammi話「你可以叫我許太了」。
另一對足夠成為經典嘅係王菲同謝霆鋒，兩人分手11年，之後分別結過婚、同另一半生兒育女，同樣離婚收場。兜咗大個圈，喺14年復合，消息驚動整個中港台。
林子善就喺今年7月入紙申請同女友Kary結婚，兩人決定下年先擺酒，預計係4月3日。兩人拍咗5年拖，但受家庭壓力下一度分手，分手後先發覺，不能沒有你，終於成功氹番女友。
吳若希同澳門闊少男友Alex都係翻撻代表，Jinny同Alex承認拍拖兩個月後，喺Ig高調又話分手，回復單身。話咁快又復合番，仲為咗肚入面個B女，停工一段時間。o依家囡囡Giselle出咗世，Jinny同Alex會喺年尾註冊，下年舉行婚禮。