【馮仁昭四圍超】成功講座重提16歲被噓霆鋒播新歌　開騷有期

【蘋果日報】謝霆鋒前晚喺灣仔出席「鋒味人生」講座，由科技講到音樂，又重提16歲入行，當時仍然未有數碼化，每一次錄音都要有音響工程師喺後面睇住，錄錯嘢就要好多嘢修改，霆鋒話：「時代進步，依家撳幾個掣就搞掂，好簡單！」
經理人喊
主持讚霆鋒做嘢好成功，問佢覺得同佢細細個就喺受注目嘅環境下成長有冇關係？家陣37歲嘅霆鋒聽到呢條問題，就有感而發：「我話你知，雖然係容易啲，不過有好有唔好，我其實由16歲出道嘅時候俾人噓，由上台噓到落台，落到台經理人喺度喊，直到19歲尾先有少少人欣賞，最緊要係一路堅持唔好放棄。」
至於幾時開演唱會？霆鋒講會盡快做，仲透露已經籌備緊，前晚仲準備咗一首從未曝光嘅新歌《有火》，連同拍MV花絮即場播，片段中有消防員救援場面。美食方面，霆鋒話因為自己鍾意食，所以先會拍《十二道鋒味》，霆鋒覺得喺內地嘅食物安全雖然日漸提升，但係對食物安全嘅知識都未跟得上。
撰文：馮仁昭