中環在線：莎莎搵「神奇女俠」教化妝

【蘋果日報】潮興網購，莎莎(178)噚日亦正式同阿里旗下天貓國際合作，開設旗艦店舖，之但係，雖然莎莎屬香港品牌，但同天貓合作後似乎難免「被強國化」，配合內地消費者口味。
噚日莎莎就請咗一班內地網紅出席開幕禮，仲玩埋直播、抽獎、播短片等，雖然主持人講廣東話，短片亦係廣東話，但無論背景板、字幕等都係用簡體字，唔講仲以為返咗內地搞記招。
活動途中，集團仲請嚟內地網絡紅人化身神奇女俠教大家化妝，現場有唔少人都拎起手機一齊睇直播玩埋一份。
不過集團咁做都不無道理，現時集團大約60%生意額來自內地人，平日喺旅客區都好易搵到旅客拎住一袋二袋「Sasa」購物袋，加上就快黃金周，難怪集團要以內地客為先。
李華華
LiWaWa@AppleDaily.com