73歲面臨入獄　公民抗命義無反顧朱牧：我會克服幽閉恐懼

【蘋果日報】相對戴耀廷、陳健民，73歲的牧師朱耀明相對較低調。人稱「朱牧」的朱耀明稱，公民抗命就是要走上法庭、走入監牢彰顯信念，佔中三子一旦入獄，只會令更多港人覺醒，「大家一定會問，點解兩位咁好嘅教授，點解一位咁年老嘅牧師會去坐監？佢哋坐乜嘢監？乜嘢罪？」他指，只要在獄中能讀能寫做研究，就可以克服內心的幽閉恐懼。
記者：姚國雄
一頭白髮，何不過着一盅兩件、弄孫為樂的安樂日子？同樣愛飲茶、有兒有孫享着天倫之樂的朱耀明，縱使佔領運動過了3年，仍多番表明不後悔成為佔中三子之一，信仰教他要守護公義，無公義的社會，安樂日子從何說起，「作為一個牧師、上帝嘅僕人，我哋一定要行公義守公義。喺一個不公平不公義嘅制度下，作為一個傳道人係毫無選擇」。由營救八九內地民運人士的黃雀行動，至2013年成為佔中三子，這四分一世紀，朱牧承諾了便義無反顧，揹着一生責任，即使兩鬢皆白面臨坐牢。
讀書寫作可令焦慮消散
害怕狹小空間帶來的幽閉恐懼，朱坦言，對牢獄的日子有恐懼，但不懼怕，做得發起人，便是要完成這段公民抗命的路：「我係好驚困喺一個狹窄嘅地方，面對法庭同坐監，我哋係預咗，我年紀大，個個月都要覆診，其實我身體唔係咁好，唯一要做嘅事就係鍛煉身體，我要計劃讀乜嘢書、擬定研究嘅題目，萬一我要入去嘅時候，我都係有計劃去做。我相信我可以處理，只要可以讀書同寫作，恐懼焦慮都可以消散。」
在人人皆可是信徒的世代，有人拿着神明來欺世盜名，也有人以為返了教會便心安理得，不談政治噤若寒蟬，朱牧對此不感詫異。他表示，教會是社會縮影，有信徒為錢為權為名為利，信了耶穌也可上台大談殺人、炮製假學歷，有信徒擔心政治表態會影響工作，甚至有信徒一心只為賺錢，賺夠便走。看在眼內，他便會想起《聖經》記載有份迫害耶穌的，其實也是有權有勢的宗教領袖：「佢哋都係社會上最有權勢嘅人，不過聖經亦都話，唔係但凡叫耶穌做主嘅人，都可以進天國。」
「社會撕裂個結要政府解」
9.28三周年，特首換了個人，會否寄望新政府不再追殺，日後政府敗訴不作上訴？朱耀明認為，不用對無認受性的制度抱期望，因為特首不是向港人負責，「來自制度嘅惡，使一個人喺呢個制度下都變質，人受到制度嘅限制，會做一啲未必願意做嘅事，我哋不應寄望一個人，應寄望一個制度」。
他舉例說，林鄭治下，一地兩檢、興建西九故宮博物館毫無諮詢：「你有權反對咩？你有話事權咩？講咗畀你聽就當係諮詢，其實不公義制度為社會埋下更多炸彈、撕裂，累積仇恨，所以呢個結，一定係政府解。」他指，與其問他對林鄭有否期望，不如問林鄭會否解開8.31人大決定這個死結。