圓圓包冚上郵輪　蔡加讚抱女玩水

【蘋果日報】【爆相爆片】玩具大王蔡志明孻仔蔡加讚，13年娶咗「宇宙最強」甄子丹姨仔汪圓圓後三年抱三。《蘋果》讀者謝小姐日前透過「爆相爆片」，分享喺星夢郵輪遇到蔡加讚同圓圓帶住大女Celine去玩嘅相，同場仲有加讚家姐加怡同姐夫，一對孖仔就唔見影。


謝小姐見到赤膊嘅蔡加讚抱着囡囡，同老婆喺甲板水池玩水，而相片睇到，主要係蔡加讚陪Celine浸水，圓圓就似乎好怕曬，着長袖衫之餘，又戴帽同太陽眼鏡，坐喺池邊睇住兩父女玩。謝小姐仲話：「嗰時係晏晝4點半，見蔡加讚就全程抱住個女，個女眼細細好得意，嗰樣似媽咪多啲，由於好熱好曬，甲板好『辣』腳，蔡加讚唔畀佢落地行。」


畀老婆休息吓

前晚蔡加讚同圓圓去又一城睇首映，噚喺電話回應話：「嗰日係東華三院喺郵輪搞慈善活動，我哋去支持吓。平時太太陪小朋友時間多啲，難得有機會成日可以陪個女，咪叫老婆休息吓。嗰度小朋友多，比較混亂，所以我就比較緊張，全程攬住佢。」