中環在線：滙豐PayMe幫你追債

【蘋果日報】講開又講，呢排滙豐真係好積極推新服務。好似手機錢包App「PayMe」即將推新功能，可以向朋友發送付款請求，若果朋友唔記得還款，仲可以連續7日發送提醒訊息追數，好過攤大手板問人攞錢咁尷尬喇。
滙豐研發PayMe負責人員解釋，以前追數相當被動，但用PayMe提點對方還錢就冇咁尷尬。而填寫港幣嘅時候，應用程式會彈計算機出嚟，假設500元3個人分賬，會計算成166.6元。
填完港幣及付款人資料後，按發送然後再用Touch ID認證，對方部電話就會收到個彈出嚟嘅訊息，不過send完之後24小時後先可以再send，唔係轟炸到冇朋友做呀。
負責人員又話會視乎研發進度，打算喺Android手機添加指紋認證登入PayMe功能，而臉部辨識登入功能就要睇未來推出嘅iPhone X實際運作後，先會研究採納。滙豐仲話，未來將會打開商業交易功能，即係PayMe有日可以去商店畀錢，不過未有確切時間表。
李華華
LiWaWa@AppleDaily.com