中環在線：純官好番開會喇

【蘋果日報】臨近新世界（017）全年業績發佈，外界關心年初中風入院的主席鄭家純康復情況。噚日同系的新創建（659）率先舉行業績記者會，行政總裁曾蔭培透露，噚日新創建董事會會議，佢都有出席，即係話純官已經復咗工嚕。
曾蔭培話，一直同純官都「有溝通、有見面」，指對方身體健康。鄭家純三子、新創建執行董事鄭志明補充，純官一如之前所講喺屋企休養，「我諗好快會見到大家」。至於今日會唔會出席新世界的業績記者會，佢就懶神秘咁話：「聽（今）日咪知！」
純官因病退下火線，過去半年多新世界由鄭志剛掌舵，新創建則仍由曾蔭培任行政總裁。不過，副行政總裁許漢忠早前宣佈將於11月辭任、轉職顧問，曾蔭培指，鄭志明由一開始參與飛機租賃，未來會接手主力負責航空業務。機會嚟啦飛雲！
李華華
LiWaWa@AppleDaily.com