中環在線：「騰訊五虎」各自各精彩　陳一丹成慈善家

【蘋果日報】13年前，騰訊（700）5名創辦人大概冇諗過，自己間公司成為「股王」，市值高達3.26萬億元。然而，外界稱為「騰訊五虎」嘅創辦人如今各有發展，淨低馬化騰、許晨曄留守。其中一名創辦人陳一丹目前投身公益事業，創立教育獎項「一丹獎」，噚日就頒發首屆得獎名單。
據福布斯今年嘅中國慈善榜，陳一丹以23.7億元人民幣位列榜首。陳一丹同馬化騰識於微時，兩人係深圳中學同學。噚日喺一丹獎記者會，佢亦提到，自己成績普通，但中學時與同學交往唔錯，最後創辦騰訊。不過外界對陳一丹2013年嘅離職了解不多，只知陳離開後，騰訊不再設首席行政官一職。
放棄如日中天嘅生意，陳一丹之後投身慈善事業，尤其重視教育。佢解釋，設立教育獎嘅原因，係佢認為教育乃民生資源，亦係解決社會問題嘅根源。但經濟學人智庫研究嘅「全球教育未來指數」，全球35個經濟體中，中國排名靠後，排31名。
陳一丹話，自己喺內地接受教育，近年中國積極增加國際交流，但仍存在貧富差距。佢認為，科技或社會組織能否縮短距離，係值得探討嘅問題。佢仲話，科技能令教育有突破性發展，例如網上授課、運用AI（人工智能）和大數據等，現今世代應將科技與教育結合發展，似乎頗有一套諗法。
李華華
LiWaWa@AppleDaily.com